Gaman á hönnunardögum

Endilega kíkja í gömlu Rúgbrauðsgerðina um helgina!

Unglingaherbergið

Börnum getur fylgt heilmikið dót, en það virðist stundum ekki neitt miðað við unglingana. Ofan á það bætist að það getur reynst þrautinni þyngra að fá þá til að halda herberginu sínu snyrtilegu (eða bara ekki eins og kjarnorkustyrjöld hafi farið þar fram). Við getum þó reynt að sjá til þess að það sé til staður fyrir allt dótið þeirra og þá koma hillur eins og expedit hillan frá IKEA að góðum notum. Benita hjá Chez Larsson hefur einmitt komið einni slíkri fyrir í herbergi 14 ára sonar síns og hýsir hún tölvuleiki, DVD myndir, tímarit, bækur og alls kyns dót sem er unglingunum nauðsyn. Í körfunum neðst er að finna snúrur og þess háttar hluti sem enginn (eða allavega ekki hún) vill sjá. Hún hefur meira að segja útbúið upphækkanir úr frauðpappa (örugglega hægt að fá afganga hjá prentstofum eins og Samskiptum eða Prenttorgi), svo hægt sé að nýta dýpt hillanna betur. Þá er allavega engin afsökun til að láta dótið sitt liggja úti um allt, en annað mál hvort það breyti einhverju um umgengnina.

Bill Gates og unglingarnir

Bill Gates hefur haldið fyrirlestur í bandarsískum gagnfræðaskóla, eða "high-school", um 11 hluti sem krakkar hafa ekki og munu ekki læra í skólanum. Hann talaði um hvernig pólitísk rétthugsun í kennslu skapar kynslóð fólks sem hefur enga raunveruleika tilfinningu og hvernig þetta getur orðið til þess að þau verði undir í hinum raunverulega heimi.

1. Lífið er ekki réttlátt - reyndu að venjast því!
2. Heiminum er sama um sjálfsímynd þína. Heimurinn væntist þess að þú áorkir einhverju áður en þú verðir ánægður með sjálfan þig.
3. Þú munt ekki fá háar tekjur strax eftir gagnfræðaskóla. Þú verður ekki forstjóri fyrr en þú hefur unnið þig upp.
4. Finnst þér kennarinn þinn vera strangur? Bíddu bara þar til þú færð yfirmann!
5. Að snúa hamborgurum er ekki fyrir neðan virðingu þína. Afi þinn og amma áttu til annað orð yfir að snúa hamborgurum: Það var kallað tækifæri.
6. Ef þú klúðrar einhverju er það ekki foreldrum þínum að kenna, svo hættu að væla yfir mistökum þínum; lærðu heldur eitthvað af þeim.
7. Áður en þú fæddist voru foreldrar þínir ekki eins leiðinlegir og þau eru núna. Þau urðu svona eftir að hafa borgað reikningana þína, þvegið fötin þín og hlustað á hversu cool þér finnst þú vera. Svo áður en þú bjargar regnskógunum gætirðu reynt að taka aðeins til hendinni í herberginu þínu.
8. Það getur verið að skólarnir útskrifi nú bæði sigurvegara og tapara, en það gerir LÍFIÐ EKKI. Í sumum skólum eru ekki lengur gefnar falleinkunnir og þú munt fá eins mörg tækifæri og þú vilt til að finna rétta svarið. Þetta er ekki í NEINNI líkingu við NEITT í raunveruleikanum.
9. Lífinu er ekki skipt í annir. Þú færð ekki frí allt sumarið og mjög fáir samstarfsmenn þínir hafa áhuga að hjálpa þér að finna sjálfan þig. Gerðu það í frítíma þínum.
10. Sjónvarpið er ekki raunveruleikinn. Í raunveruleikanum þarf fólk í alvörunni að yfirgefa kaffihúsið og fara í vinnuna.
11. Komið vel fram við nördana. Það eru allar líkur á að þeir verði yfirmenn þínir í framtíðinni.

Svona er lífið samkvæmt Bill Gates. Ég á ekki sjálf ungling en það mun koma að því. Þá getur verið að ég vilji líta aftur yfir þennan lista og sækja styrk þaðan. Eða hvað haldið þið, þið sem eigið unglinga?

PS Okkur hefur verið bent á að það hafi alls ekki verið Bill Gates sem hélt þennan fyrirlestur, heldur hafi það verið maður að nafni Charles J. Sykes sem skrifaði grein um þetta í San Diego Union-Tribune árið 1996. Lesið meira um þetta hér. Hver sem upphafsmaðurinn að þessum punktum var er mikill sannleikur fólginn í þeim og fyndist okkur sérstaklega áhugavert að heyra hvað ykkur sem eigið unglinga finnst um þá.

(Smellið á LESIÐ NÁNAR til að sjá alla greinina)